Azərbaycan Respublikası Ədliyyə
Nazirinin
«16» mart 2007-ci il tarixli 9-T
№-li əmri ilə təsdiq edilmişdir
Azərbaycan Respublikası Ədliyyə
Nazirliyinin Bələdiyyələrlə iş mərkəzi haqqında
Ə S A S N A M Ə
I. Ümumi
müddəalar
1. Azərbaycan Respublikası Ədliyyə Nazirliyinin Bələdiyyələrlə iş
mərkəzi (bundan sonra – Mərkəz) Azərbaycan Respublikası Ədliyyə Nazirliyi
mərkəzi aparatının baş idarə səlahiyyətli müstəqil struktur qurumudur.
2. Mərkəz öz fəaliyyətində Azərbaycan Respublikasının Konstitusiyasını, «Yerli
özünüidarə haqqında» Avropa Xartiyasını, Azərbaycan Respublikasının tərəfdar
çıxdığı digər beynəlxalq müqavilələri, «Bələdiyyələrin fəaliyyətinə inzibati
nəzarət haqqında» və «Ədliyyə orqanlarında qulluq keçmə haqqında» Azərbaycan
Respublikasının qanunlarını, Azərbaycan Respublikası Prezidentinin fərmanı ilə
təsdiq edilmiş «Azərbaycan Respublikasının Ədliyyə Nazirliyi haqqında
Əsasnamə»ni, Azərbaycan Respublikası Ədliyyə Nazirliyinin (bundan sonra –
Nazirlik) əmri ilə təsdiq edilmiş «Bələdiyyələrin fəaliyyətinə inzibati
nəzarətin təşkili haqqında Təlimat»ı, Azərbaycan Respublikasının digər normativ
hüquqi aktlarını, o cümlədən bələdiyyə fəaliyyətini tənzimləyən digər
qanunları, həmçinin
Nazirliyin kollegiyasının qərarlarını, Nazirlik üzrə əmr və sərəncamları,
habelə bu Əsasnaməni rəhbər tutur.
3. Mərkəz fəaliyyətini Nazirliyin sisteminə daxil olan qurumlarla və digər
dövlət və yerli özünüidarə orqanları ilə əlaqəli həyata keçirir.
4. Mərkəz Azərbaycan Respublikasının Dövlət gerbinin təsviri və öz adı həkk
olunmuş möhürə, müvafiq ştamplara və blanklara malikdir.
II.
Mərkəzin fəaliyyət istiqamətləri
5. Mərkəzin fəaliyyət istiqamətləri aşağıdakılardır:
5.1. bələdiyyələrin fəaliyyətinin təşkil edilməsinə kömək edir və onlara
metodoloji yardım göstərir;
5.2. bələdiyyələrin fəaliyyətinə inzibati nəzarəti həyata keçirir;
5.3. qanunvericiliklə müəyyən edilmiş digər istiqamətlərdə fəaliyyət göstərir.
III.
Mərkəzin vəzifələri
6. Mərkəz bu Əsasnamə ilə müəyyən edilmiş fəaliyyət
istiqamətlərinə uyğun olaraq aşağıdakı vəzifələri yerinə yetirir:
6.1. bələdiyyələrin fəaliyyətinin müasir tələblərə və hamılıqla qəbul edilmiş
standartlara uyğun təşkil edilməsinə kömək etmək və onlara metodoloji yardım
göstərmək;
6.2. bələdiyyələr tərəfindən Azərbaycan Respublikasının Konstitusiyasına və
qanunlarına, Azərbaycan Respublikası Prezidentinin fərmanlarına və Azərbaycan
Respublikası Nazirlər Kabinetinin qərarlarına riayət edilməsinin təmin
olunması,
bələdiyyələr tərəfindən qanunvericiliyin pozulması hallarının
aradan qaldırılması məqsədi ilə qanunvericiliklə müəyyən edilmiş qaydada
bələdiyyələrin fəaliyyətinə inzibati nəzarəti həyata keçirmək;
6.3. bələdiyyələrin fəaliyyətində yol verilmiş qanun pozuntularının səbəb və
şəraitinin öyrənilməsi və onların gələcəkdə qarşısının alınması məqsədi ilə
müvafiq təhlil və ümumiləşdirmələr aparmaq;
6.4. bələdiyyələrin fəaliyyətində aşkar edilmiş nöqsanların aradan qaldırılması
məqsədi ilə tövsiyələr hazırlamaq;
6.5. bələdiyyələrə kömək və onlara metodoloji yardım, bələdiyyələrin
fəaliyyətinə inzibati nəzarətin həyata keçirilməsi işində regional ədliyyə
şöbələrinə metodik rəhbərlik etmək, bu istiqamətdə işin aparılmasına nəzarət
etmək, habelə Naxçıvan Muxtar Respublikasının Ədliyyə Nazirliyinə bələdiyyələrə
iş üzrə metodik köməklik etmək;
6.6. «Yerli özünüidarə orqanlarının normativ aktları bülleteni»ni və metodik
vəsaitlər hazırlamaq;
6.7. bələdiyyə üzvləri və qulluqçuları arasında hüququn ayrı- ayrı sahələrinə
dair tədris-maarifçilik tədbirləri keçirməklə onların hüquqi biliklərinin
artırılmasına kömək etmək;
6.8. bələdiyyələr haqqında qanunvericilik aktları barədə bələdiyyələri
məlumatlandırmaq;
6.9. bələdiyyə üzvlərinin və qulluqçularının sorğularına və vətəndaşların
müraciətlərinə cavab vermək;
6.10. bələdiyyələrin qeydiyyata alınmaq üçün təqdim olunan normativ aktlarına
dair rəy hazırlamaq;
6.11. inkişaf etmiş ölkələrin bələdiyyə fəaliyyətinə dair təcrübəsini öyrənmək,
mütərəqqi təcrübəni tətbiq etmək məqsədi
ilə qarşılıqlı əlaqələrin qurulmasında bələdiyyələrə kömək
göstərmək;
6.12. Mərkəzdə arxiv işini təşkil etmək;
6.13. bələdiyyələrin fəaliyyətinə inzibati nəzarətlə bağlı Azərbaycan
Respublikasının Milli Məclisinə illik məruzə hazırlamaq;
6.14. fəaliyyət istiqamətləri üzrə və Nazirliyin rəhbərliyinin tapşırıqları
əsasında digər vəzifələri yerinə yetirmək.
IV.
Mərkəzin hüquqları
7. Mərkəz öz vəzifələrini həyata keçirmək üçün aşağıdakı hüquqlara
malikdir:
7.1. dövlət və yerli özünüidarə orqanlarına, fiziki və hüquqi şəxslərə,
Nazirliyin sisteminə daxil olan qurumlara müraciət etmək, onlara sorğular
vermək və məlumatlar almaq;
7.2. regional ədliyyə şöbələrində bələdiyyələrə kömək və onlara metodoloji
yardım, inzibati nəzarətin həyata keçirilməsi işinin təşkilini öyrənmək və bu
sahədə təkliflər vermək;
7.3. daxil olmuş müraciətə baxarkən zəruri hallarda yerində araşdırmalar
aparmaq;
7.4. bələdiyyələrin fəaliyyətinə inzibati nəzarəti həyata keçirərkən
bələdiyyələrin fəaliyyətində qanunçuluq prinsipinə riayət olunmasının təmin
edilməsi ilə bağlı ümumiləşdirmələr aparmaq və onları öz təklif və tövsiyələri
ilə birlikdə müvafiq bələdiyyələrə təqdim etmək;
7.5. bələdiyyə aktının Azərbaycan Respublikasının Konstitusiyasına və digər
qanunvericilik aktlarına zidd olması barədə kifayət qədər əsas olduqda aktın
qanunvericiliklə müəyyən
olunmuş müddətdə dəyişdirilməsi və ya ləğv edilməsi haqqında
müvafiq bələdiyyəyə müraciət etmək və bələdiyyə tərəfindən qanunun tələbinə
əməl edilmədikdə məhkəmə qarşısında iddia qaldırmaq;
7.6. hər hansı bələdiyyə aktı və ya bələdiyyənin fəaliyyəti dövlət mənafelərinə
və ya ictimai mənafelərə ağır ziyan vura bilərsə, dərhal həmin aktın ləğv
edilməsi və ya həmin fəaliyyətə xitam verilməsi haqqında müvafiq bələdiyyəyə
təklif vermək və təklif qanunla müəyyən edilmiş müddətdə bələdiyyə tərəfindən
yerinə yetirilmədikdə məhkəmə qarşısında iddia qaldırmaq;
7.7 müvafiq qanunvericiliyin tələbləri pozulduqda yerli rəy sorğusunun təyin
edilməsi haqqında qərardan məhkəməyə şikayət vermək;
7.8. mütləq təqdim olunan bələdiyyə aktlarının surətlərinin vaxtında
göndərilməməsinə və bələdiyyələrin fəaliyyətinə inzibati nəzarəti həyata
keçirən orqan tərəfindən araşdırmaların aparılmasına maneçilik törədilməsinə
görə inzibati məsuliyyətə cəlb edilmə məsələsinin həlli üçün məhkəməyə müraciət
etmək;
7.9. inzibati nəzarət həyata keçirilərkən aşkar edilmiş qanunsuz fəaliyyətin
dayandırılması və vurulmuş ziyanın aradan qaldırılması, dövlət qeydiyyatına
alınmamış normativ aktlarının tətbiqi halları aşkar olunduqda həmin aktın
tətbiqinin dayandırılması və qeydiyyata alınması barədə bələdiyyələrə müraciət
edir;
7.10. bələdiyyənin fəaliyyətində cinayət əlamətləri aşkar olunduqda müvafiq
tədbir görülməsi üçün səlahiyyətli dövlət orqanlarına müraciət etmək;
7.11. bələdiyyələrə kömək məqsədi ilə bələdiyyə assosiasiyaları və
digər qeyri-hökumət təşkilatları ilə birgə layihələr hazırlamaq və həyata
keçirmək;
7.12. səlahiyyətləri daxilində insan və vətəndaş hüquqları və azadlıqlarının
həyata keçirilməsinin təmin edilməsi və onların pozulmasının qarşısının
alınması məqsədi ilə bu sahədə yerli və beynəlxalq qeyri-hökumət təşkilatları
ilə əlaqələr yaratmaq;
7.13. bələdiyyələrlə iş üzrə beynəlxalq əməkdaşlıq məsələlərinə dair təkliflər
vermək;
7.14. bələdiyyə kadrlarının təkmilləşdirilməsi işində iştirak etmək;
7.15. müstəqil ekspertləri və mütəxəssisləri qanunvericiliklə müəyyən edilmiş
qaydada öz fəaliyyətinə cəlb etmək;
7.16. vəzifələrinin icrası ilə əlaqədar digər hüquqları həyata keçirmək.
V. Mərkəzin
fəaliyyətinin təşkili
8. Mərkəzin strukturu və ştat vahidlərinin sayı Azərbaycan
Respublikasının ədliyyə naziri tərəfindən təsdiq olunur.
9. Mərkəzin strukturuna İnzibati nəzarət idarəsi daxildir. Mərkəz
bələdiyyələrin fəaliyyətinə inzibati nəzarəti bu struktur bölməsi vasitəsilə
həyata keçirir.
10. Mərkəzə Azərbaycan Respublikasının ədliyyə naziri tərəfindən vəzifəyə təyin
və vəzifədən azad olunan rəis rəhbərlik edir. Rəis Mərkəzə həvalə olunmuş
vəzifələrin yerinə yetirilməsi və hüquqların həyata keçirilməsi üçün şəxsən
məsuliyyət daşıyır.
11. Mərkəzin rəisinin Azərbaycan Respublikasının ədliyyə naziri tərəfindən
vəzifəyə təyin və vəzifədən azad edilən müavini
vardır. Mərkəzin rəis müavini ona həvalə edilmiş vəzifələri yerinə
yetirir və bunun üçün şəxsən məsuliyyət daşıyır.
12. Mərkəzin İnzibati nəzarət idarəsinə Azərbaycan Respublikasının ədliyyə
naziri tərəfindən vəzifəyə təyin və vəzifədən azad olunan rəis rəhbərlik edir.
13. Mərkəzin rəis müavini və işçiləri öz funksiyalarını vəzifə və iş bölgüsünə
əsasən yerinə yetirirlər.
14. Mərkəz işini fəaliyyət istiqamətləri, habelə Nazirliyin və Mərkəzin iş
planları əsasında həyata keçirir.
15. Mərkəzdə işin təşkili və vəziyyəti, iş planlarında nəzərdə tutulmuş
tədbirlərin yerinə yetirilməsi, qarşıda duran vəzifələrin həyata keçirilməsi
ilə əlaqədar məsələlər mütəmadi olaraq Mərkəzin rəisinin yanında keçirilən
iclaslarda müzakirə edilir.
16. Mərkəzin rəisi:
16.1. Mərkəzin işini təşkil edir və onun fəaliyyətinə rəhbərliyi həyata
keçirir;
16.2. Mərkəzin işçiləri arasında vəzifə və iş bölgüsü aparır;
16.3. Mərkəzin işçiləri tərəfindən vəzifələrinin yerinə yetirilməsinə, icra və
əmək intizamına nəzarət edir;
16.4. Mərkəzin müvafiq hesabatlarını və iş planını təsdiq edir, onun vaxtında
və keyfiyyətlə icra olunmasına nəzarət edir;
16.5. Mərkəzin fəaliyyətini Nazirliyin sisteminə daxil olan qurumlarla
əlaqələndirir;
16.6. qanunvericiliklə müəyyən edilmiş qaydada bələdiyyələrin fəaliyyətinə
inzibati nəzarətin həyata keçirilməsini təmin edir, inzibati nəzarət həyata
keçirilərkən qanunvericiliyə əməl olunmasına nəzarət edir;
16.7. inzibati nəzarət həyata keçirilərkən aşkar edilmiş qanunsuz
fəaliyyətin dayandırılması və vurulmuş ziyanın aradan qaldırılması, dövlət
qeydiyyatına alınmamış normativ aktlarının tətbiqi halları aşkar olunduqda
həmin aktın tətbiqinin dayandırılması və qeydiyyata alınması barədə
bələdiyyələrə müraciət edir;
16.8. mütləq təqdim olunan bələdiyyə aktlarının surətlərinin vaxtında
göndərilməməsinə və bələdiyyələrin fəaliyyətinə inzibati nəzarəti həyata
keçirən orqan tərəfindən araşdırmaların aparılmasına maneçilik törədilməsinə
görə inzibati məsuliyyətə cəlb edilməsi məsələsini həll edir;
16.9. bələdiyyələrin normativ hüquqi aktlara zidd aktlarının dəyişdirilməsi,
ləğv edilməsi barədə qanunla müəyyən edilmiş tədbirlərin həyata keçirilməsini
təmin edir;
16.10. qanunvericiliklə nəzərdə tutulmuş qaydada və bu Əsasnamə ilə müəyyən edilmiş
hallarda məhkəmələrə şikayət verir, müraciət edir və məhkəmələrdə iddia
qaldırır;
16.11. inzibati nəzarətin həyata keçirilməsi zamanı aşkar olunmuş qanun
pozuntularının profilaktikası məqsədilə tədbirlər təşkil edir;
16.12. zərurət yarandıqda inzibati nəzarətin həyata keçirilməsi zamanı
ekspertlərin və mütəxəssislərin cəlb edilməsini təşkil edir;
16.13. Mərkəzin fəaliyyəti ilə bağlı məsələlərin Nazirliyin kollegiyasının
müzakirəsinə çıxarılması üçün təşəbbüs göstərir, bu məsələlərin kollegiyanın
müzakirəsinə hazırlanmasını təmin edir;
16.14. Nazirliyin iş planında və kollegiyanın qərarlarında, Nazirlik üzrə əmr
və sərəncamlarda nəzərdə tutulmuş aidiyyəti tədbirlərin yerinə yetirilməsini
təmin edir;
16.15. Mərkəzə yeni qəbul edilmiş işçiləri təcrübəli əməkdaşlara
təhkim edir və onların işinə bilavasitə nəzarət edir;
16.16. zəruri olan hallarda böyük həcmli tapşırıqların icrasını vaxtında təmin
etmək üçün onların icrasını bir neçə işçiyə tapşırır və ya bir işçinin
icraatından digər işçinin icraatına verir;
16.17. Mərkəzdə işçilərin vəzifəyə təyin və vəzifədən azad edilməsi,
həvəsləndirilməsi, onlara xüsusi rütbə və ixtisas dərəcələrinin verilməsi,
intizam tənbeh tədbirlərinin tətbiq olunması, habelə işçilərin vəzifədən
kənarlaşdırılması ilə bağlı Nazirliyin rəhbərliyinə təkliflər verir;
16.18. Mərkəzin fəaliyyətinin təkmilləşdirilməsi sahəsində tədbirlər görür, bu
barədə Nazirliyin rəhbərliyinə təkliflər verir;
16.19. vətəndaşları qəbul edir, Mərkəzdə vətəndaşların qəbulunu və
müraciətlərinə baxılması işini təmin edir;
16.20. səlahiyyətləri daxilində icrası məcburi olan sərəncamlar verir, onların
icrasını təşkil edir və icrasına nəzarəti həyata keçirir;
16.21. səlahiyyətlərinin bir hissəsinin həyata keçirilməsini müavininə
tapşırır;
16.22. səlahiyyətləri daxilində digər məsələləri həll edir;
16.23. xidməti fəaliyyətlə bağlı Nazirliyin rəhbərliyinin tapşırıqlarını yerinə
yetirir.
17. Mərkəzin rəis müavini:
17.1. bələdiyyələrə metodoloji yardım işinin aparılmasını təşkil edir;
17.2. bələdiyyələr haqqında qanunvericilik aktları barədə bələdiyyələrin
məlumatlandırılması işini təşkil edir;
17.3. bələdiyyə üzvləri və qulluqçuları arasında hüququn ayrı- ayrı sahələrinə
dair tədris-maarifçilik tədbirləri təşkil edir;
17.4. Mərkəzdə kargüzarlıq işini təşkil edir;
17.5. Mərkəzin fəaliyyəti ilə bağlı məsələləri Nazirliyin kollegiyasının
müzakirəsinə hazırlayır;
17.6. Mərkəzin fəaliyyətinin təkmilləşdirilməsi üzrə Mərkəzin rəisinə təkliflər
verir;
17.7. Mərkəzin işçilərinin icraatında olan sənədlərin düzgün və vaxtında icra
olunmasına nəzarət edir;
17.8. Mərkəzin işçilərini cəlb etməklə ümumiləşdirmələr aparır, iş planının
layihəsini, statistik hesabatlar hazırlayır və Mərkəzin rəisinə təqdim edir;
17.9. Mərkəzin rəisi öz vəzifələrini icra edə bilmədikdə onun səlahiyyətlərini
yerinə yetirir;
17.10. vətəndaşları qəbul edir;
17.11. ona tapşırılmış sahədə işin düzgün təşkil və icra olunmasını təmin edir;
17.12. peşə hazırlığının yüksəldilməsi məqsədilə qanunvericiliyi daim öyrənir,
işgüzar və peşə keyfiyyətlərinin yüksəldilməsinə çalışır;
17.13. xidməti fəaliyyəti ilə bağlı Nazirliyin rəhbərliyinin və Mərkəzinin
rəisinin tapşırıqlarını yerinə yetirir.
18. İnzibati nəzarət idarəsinin rəisi:
18.1. idarənin işini təşkil edir və fəaliyyətinə rəhbərliyi həyata keçirir;
18.2. idarədə işçilərin fəaliyyətini istiqamətləndirir, onlara həvalə edilən
vəzifələrin yerinə yetirilməsini, əmək və icra intizamını təmin edir;
18.3. qanunvericiliklə müəyyən edilmiş qaydada bələdiyyələrin
fəaliyyətinə inzibati nəzarətin həyata keçirilməsini təşkil edir;
18.4. inzibati nəzarətin həyata keçirilməsi ilə bağlı zəruri sənədlərin və
məlumatların göndərilməsi barədə bələdiyyələrə müraciət edir;
18.5. inzibati nəzarət həyata keçirilərkən aşkar edilmiş qanunsuz fəaliyyətin
dayandırılması və vurulmuş ziyanın aradan qaldırılması ilə bağlı bələdiyyələrə
müraciət edilməsi barədə Mərkəzin rəhbərliyinə təkliflər verir;
18.6. bələdiyyələrin fəaliyyətinə inzibati nəzarəti həyata keçirərkən
bələdiyyələrin dövlət qeydiyyatına alınmamış normativ aktlarının tətbiqi halları
aşkar olunduqda həmin aktın tətbiqinin dayandırılması və qeydiyyata alınması
barədə bələdiyyələrə müraciət üçün Mərkəzin rəhbərliyinə təkliflər verir;
18.7. mütləq təqdim olunan bələdiyyə aktlarının surətlərinin vaxtında
göndərilməməsinə və bələdiyyələrin fəaliyyətinə inzibati nəzarəti həyata
keçirən orqan tərəfindən araşdırmaların aparılmasına maneçilik törədilməsinə
görə inzibati məsuliyyətə cəlb etmə barədə Mərkəzin rəhbərliyinə təkliflər
verir;
18.8. bələdiyyələrin normativ hüquqi aktlara zidd aktlarının dəyişdirilməsi,
ləğv edilməsi barədə qanunla müəyyən edilmiş tədbirlərin həyata keçirilməsi
üçün Mərkəzin rəhbərliyinə təkliflər verir;
18.9. bələdiyyələrin fəaliyyətinə inzibati nəzarət işinin yaxşılaşdırılması
məqsədi ilə təkliflər verir;
18.10. inzibati nəzarətin həyata keçirilməsi zamanı aşkar olunmuş qanun
pozuntularının profilaktikası məqsədilə tədbirlər keçirilməsi barədə təkliflər
hazırlayır;
18.11. inzibati nəzarət icraatının başlanılmasını və müəyyən
edilmiş müddətdə başa çatdırılmasını təmin edir;
18.12. inzibati nəzarət həyata keçirilərkən qanunvericiliyə əməl olunmasını
təmin edir;
18.13. inzibati nəzarətin həyata keçirilməsi zamanı zərurət yarandıqda
ekspertlərin və mütəxəssislərin cəlb edilməsi haqqında təklif verir;
18.14. Nazirliyin kollegiyasının qərarlarında, Nazirlik üzrə əmr və
sərəncamlarda, habelə iş planlarında nəzərdə tutulmuş aidiyyəti tədbirlərin
yerinə yetirilməsini səlahiyyətləri daxilində təmin edir;
18.15. idarənin fəaliyyəti ilə bağlı məsələlərin Nazirliyin kollegiyasının müzakirəsinə
çıxarılması barədə Mərkəzin rəisinə təklif verir, Mərkəzin fəaliyyəti ilə bağlı
aidiyyəti məsələləri Nazirliyin kollegiyasının müzakirəsinə hazırlayır;
18.16. idarənin müvafiq hesabatlarını Mərkəzin rəisinə təqdim edir;
18.17. idarəyə yeni təyin olunmuş işçiləri təcrübəli əməkdaşlara təhkim edir və
onların işinə bilavasitə nəzarət edir;
18.18. idarədə işçilərin həvəsləndirilməsi, onlara xüsusi rütbələrin və ixtisas
dərəcələrinin verilməsi, intizam tənbeh tədbirlərinin tətbiq olunması, habelə
işçilərin vəzifədən kənarlaşdırılması ilə bağlı Mərkəzin rəisinə təkliflər
verir;
18.19. vətəndaşları qəbul edir;
18.20. idarənin fəaliyyətinin təkmilləşdirilməsi sahəsində tədbirlər görür, bu
barədə Mərkəzin rəisinə təkliflər verir;
18.21. səlahiyyətləri daxilində digər məsələləri həll edir;
18.22. peşə hazırlığının yüksəldilməsi məqsədilə qanunvericiliyi
daim öyrənir, işgüzar və peşə keyfiyyətlərinin yüksəldilməsinə çalışır;
18.23. xidməti fəaliyyətlə bağlı Nazirliyin və Mərkəzin rəhbərliyinin digər
tapşırıqlarını yerinə yetirir.
19. Mərkəzin İnzibati nəzarət idarəsinə daxil olmayan baş
məsləhətçi, böyük məsləhətçi, aparıcı məsləhətci və məsləhətçi Mərkəzin
fəaliyyət istiqamətlərinə uyğun olaraq, vəzifə və iş bölgüsünə əsasən aşağıdakı
işləri icra edir:
19.1. bələdiyyələrin fəaliyyəti ilə bağlı işin təşkilində mövcud olan
problemləri öyrənir, onların həlli məqsədilə tövsiyə və təkliflər, metodik
vəsaitlər hazırlayır və Mərkəzin rəhbərliyinə təqdim edir;
19.2. bələdiyyə üzvlərinin və qulluqçularının sorğularına, habelə vətəndaşların
müraciətlərinə cavab hazırlayır;
19.3. bələdiyyələrdə hüquqi maarifləndirmə işini aparır, bələdiyyə üzvləri və
qulluqçuları arasında hüququn ayrı-ayrı sahələrinə dair diskussiyalar,
seminarlar və yığıncaqlar keçirir;
19.4. xarici ölkələrin müvafiq iş təcrübəsini öyrənir, inkişaf etmiş ölkələrin
bələdiyyə fəaliyyətinə dair təcrübəsinin öyrənilməsində, mütərəqqi təcrübəni
tətbiq etmək məqsədi ilə qarşılıqlı əlaqələrin qurulmasında bələdiyyələrə kömək
göstərir;
19.5. müvafiq təhlillər, ümumiləşdirmələr və hesabatlar hazırlayır;
19.6. «Yerli özünüidarə orqanlarının normativ aktları bülleteni»nin nəşri üçün
materiallar toplayır, bələdiyyələrin fəaliyyəti ilə bağlı mətbuatda dərc
olunmuş materialları öyrənir və
zəruri məlumatları Mərkəzin rəisinə təqdim edir, mətbuat üçün
məlumatlar hazırlayır;
19.7. Mərkəzin rəisinin tapşırığına əsasən bələdiyyələrin fəaliyyətinə inzibati
nəzarətin həyata keçirilməsi ilə bağlı bu Əsasnamədə müəyyən edilmiş digər
vəzifələri yerinə yetirir;
19.8. peşə hazırlığının yüksəldilməsi məqsədilə qanunvericiliyi daim öyrənir,
işgüzar və peşə keyfiyyətlərinin yüksəldilməsinə çalışır, əmək və icra
intizamına əməl edir, vəzifələrinin vaxtında və düzgün icra edilməsinə görə
məsuliyyət daşıyır;
19.9. xidməti fəaliyyətlə bağlı Mərkəzin rəhbərliyinin digər tapşırıqlarını
yerinə yetirir.
20. İnzibati nəzarət idarəsinə daxil olan baş məsləhətçi, böyük
məsləhətçi, aparıcı məsləhətçi və məsləhətçi Mərkəzin fəaliyyət istiqamətlərinə
uyğun olaraq, vəzifə və iş bölgüsünə əsasən aşağıdakı işləri icra edir:
20.1. icraatında olan müraciətlər və bələdiyyə aktları üzrə bələdiyyələrin
fəaliyyətinə inzibati nəzarətin həyata keçirilməsində iştirak edir, müraciətdə
göstərilənlər təsdiq olunmadığı halda inzibati nəzarət icraatı başlanmasından imtina
olunması barədə əsaslandırılmış cavab hazırlayır;
20.2. icraatında olan bələdiyyə aktlarında qanunvericiliyin tələblərinin
pozulması halları aşkar edilmədikdə bununla əlaqədar arayış hazırlayır;
20.3. icraatında olan müraciətlərdə və bələdiyyə aktlarında inzibati nəzarət
icraatı başlamaq üçün əsaslar müəyyən edildikdə bu barədə Mərkəzin rəhbərliyinə
məruzə edir və ona verilmiş tapşırığa uyğun olaraq inzibati nəzarət icraatını
başlayır;
20.4. icraatında olan bələdiyyə aktının ləğv edilməsi və yaxud dəyişdirilməsi
üçün təkliflər, zəruri hallarda tövsiyələr hazırlayır;
20.5. mütləq təqdim olunmalı bələdiyyə aktının inzibati nəzarət qaydasında
araşdırılmaq üçün təqdim olunmadığını müəyyən etdikdə inzibati məsuliyyətə cəlb
etmə haqqında təklif verir, mütləq təqdim olunan bələdiyyə aktlarının
surətlərinin vaxtında göndərilməməsinə və bələdiyyələrin fəaliyyətinə inzibati
nəzarəti həyata keçirən orqan tərəfindən araşdırmaların aparılmasına maneçilik
törədilməsinə görə inzibati məsuliyyətə cəlb etmə barədə Mərkəzin rəhbərliyinə
təklif verir;
20.6. bələdiyyənin fəaliyyətində cinayət xarakterli hallar aşkar etdikdə
müvafiq sənədlərin hazırlanaraq hüquqi rəy verilməsi üçün prokurorluq orqanına
göndərilməsi barədə təklif verir, inzibati məsuliyyətə cəlbetmə haqqında sənədləri,
bələdiyyə aktlarının ləğv edilməsi və ya dəyişdirilməsi üçün iddia ərizələrini
hazırlayır, məhkəmədə Nazirliyi təmsil edir;
20.7. vətəndaşların qəbulunda iştirak edir, onların müraciətlərində qoyulmuş
məsələlər üzrə izahlar verir, sorğulara cavab hazırlayır, bələdiyyələrdə işin
təşkilinə, inzibati nəzarətin və qanunvericiliyin təkmilləşdirilməsinə dair
təkliflər verir, görülmüş işlər barədə hesabatlar hazırlayır;
20.8. tapşırılmış məsələlər üzrə ümumiləşdirmələr və təhlillər aparır;
20.9 peşə hazırlığının yüksəldilməsi məqsədilə qanunvericiliyi daim öyrənir,
işgüzar və peşə keyfiyyətlərinin yüksəldilməsinə çalışır, əmək və icra
intizamına əməl edir, vəzifələrinin vaxtında və düzgün icra edilməsinə görə
məsuliyyət daşıyır;
20.10. xidməti fəaliyyətlə bağlı Mərkəzin rəhbərliyinin və idarə rəisinin digər
tapşırıqlarını yerinə yetirirlər.
21. Məsləhətçisi (kompüter üzrə):
21.1. daxil olan müraciətlər və xidməti fəaliyyətlə bağlı digər informasiyalar
üzrə məlumat bazaları yaradır və onları aktual saxlayır;
21.2. Mərkəzin rəhbərliyinin tapşırıqlarına əsasən məlumat bazalarında olan
informasiyaları təsnifatlaşdıraraq onlara təqdim edir;
21.3. məlumat bazalarının mühafizəsini təmin edir, mütəmadi olaraq məlumat
bazalarının sığorta nüsxələrini yaradır;
21.4. peşə hazırlığının yüksəldilməsi məqsədi ilə informasiya texnologiyalarını
daim öyrənir, Mərkəzdə informasiya texnologiyalarının səmərəli istifadəsinə
dair tədbirlər görür, bu barədə təkliflər verir, işgüzar və peşə
keyfiyyətlərinin yüksəldilməsinə çalışır, əmək və icra intizamına əməl edir,
vəzifələrinin vaxtında və düzgün icra edilməsinə görə məsuliyyət daşıyır;
21.5. xidməti fəaliyyətlə bağlı Mərkəzin rəhbərliyinin digər tapşırıqlarını
yerinə yetirir.
22. İnzibati nəzarət idarəsinin məsləhətçisi (iqtisadçı):
22.1. inzibati icraat zamanı bələdiyyələrin maliyyə təsərrüfat fəaliyyətinin
araşdırılmasında iştirak edir, araşdırmanın nəticələri üzrə rəy və təkliflərini
hazırlayır;
22.2. bələdiyyə sahəsində qanunvericiliyi, o cümlədən maliyyə təsərrüfat
sahəsini tənzimləyən normativ hüquqi aktları mütəmadi öyrənir, öz biliyini
təkmilləşdirir;
22.3. bələdiyyələrin maliyyə-təsərrüfat sahəsində işinin düzgün
təşkili ilə bağlı təklif və tövsiyələr hazırlayır, təhlil və ümumiləşdirmələr
aparır;
22.4. peşə hazırlığının yüksəldilməsi məqsədilə müvafiq qanunvericiliyi daim
öyrənir, işgüzar və peşə keyfiyyətlərinin yüksəldilməsinə çalışır, əmək və icra
intizamına əməl edir, vəzifələrinin vaxtında və düzgün icra edilməsinə görə
məsuliyyət daşıyır;
22.5. xidməti fəaliyyətlə bağlı Mərkəzin rəhbərliyinin digər tapşırıqlarını
yerinə yetirir.
23. Mərkəzin və İnzibati nəzarət idarəsinin baş mütəxəssisi (böyük
inspektor), böyük mütəxəssisi (inspektor) vəzifə və iş bölgüsünə əsasən
aşağıdakı işləri icra edir:
23.1. daxil olan sənədləri və müraciətləri qəbul edir və onların qeydiyyatını
aparır;
23.2. daxil olan sənədləri Mərkəzin rəisinə təqdim edir, onun dərkənarına
əsasən sənədləri icraçılara təqdim edir;
23.3. sənədlərin qanunvericiliklə nəzərdə tutulmuş müddətlərdə icra olunmasını nəzarətdə
saxlayır, onların icra müddətinin gözlənilməsi ilə bağlı aidiyyəti üzrə
Mərkəzin rəhbərliyinə və İnzibati nəzarət idarəsinin rəisinə məlumat təqdim
edir;
23.4. sənədlərin işçilər tərəfindən icra edilməsinin qeydiyyatını aparır və
ünvana göndərilməsini həyata keçirir;
23.5. Mərkəzin rəisinin sərəncamlarının qeydiyyatını aparır, onların müvafiq
struktur qurumlara çatdırılmasını təmin edir;
23.6. icra olunmuş sənədlərin işə tikilməsini və saxlanılmasını təmin edir;
23.7. işgüzar və peşə keyfiyyətlərinin yüksəldilməsinə çalışır,
əmək və icra intizamına əməl edir, vəzifələrinin vaxtında və düzgün icra
edilməsinə görə məsuliyyət daşıyır;
23.8. xidməti fəaliyyətlə bağlı Mərkəzin rəhbərliyinin digər tapşırıqlarını
yerinə yetirir.